Kryeministri i Maqedonisë Zoran Zaev, tashmë ndodhet në Sofje.

Në një bisedë telefonike ai tha se ka biseduar edhe me një nga të mbijetuarit, raporton mk-tv21.

“Kam arritur të flas me njërin prej të mbijetuarve. Ai ka thënë se është dëgjuar një shpërthim i fortë, pas së cilës ai dhe 7 pasagjerë të tjerë kanë arritur të dalin nga dritaret”, tha Zaev, i cili së bashku me ministrin e Shëndetësisë Venko Filipçe dhe Ministrin e Punëve të Jashtme Bujar Osmani, tashmë janë në Sofje.

Zaev shtoi se kanë besim te autoritetet bullgare dhe se nuk do të kërkojë hetim paralel.

“Ne u besojmë kolegëve tanë bullgarë. Nëse ata kanë nevojë për ndihmë, ne jemi të gatshëm t’i ndihmojmë në hetim. Tani gjëja më e rëndësishme është të shohim se si t’i ndihmojmë viktimat”, shtoi Zaev.

Pas njohjes me gjendjen e të lënduarve, kryeministri do të takohet me homologun e tij bullgar Stefan Janev.