Ministri i Shëndetësisë, Armend Zemaj,  i shoqëruar nga drejtori i IKSHPK-së,  Naser Ramadani, kryeinspektorja shëndetësore, Nora Krasniqi, kryeinspektori i Agjencisë së Ushqimit dhe Veterinës së Kosovës, Ibrahim Tërshnajku dhe drejtori i Përgjithshëm i Policisë së Kosovës, Rashit Qalaja kanë vizituar pikën kufitare me Shqipërinë në Vërmicë, për të parë implementimin e masave të reja të Qeverisë së Kosovës për COVID-19, transmeton Reporteri.net.

Gjatë kësaj vizite iu bë thirrje që qytetarët të vazhdojnë respektimin e rekomandimeve si mbajtjen e maskave, higjienën dhe distancën.

Zemaj me këtë rast u ka shpërndarë maska shoferëve të cilët po hynin në pikën kufitare në Vërmicë dhe i ka porositur ata që të zbatojnë masat e rekomanduara nga Instituti.

Ministri Zemaj i ka porositur edhe doganierët, policët e mjekët që të jenë strikt në zbatimin e masave.

“Po shohim në praktikë si po qëndron çështja e lëvizjes së lirë. Ju lutem të gjithë atyre që hyjnë në Kosovë të respektojnë masat”, ka thënë ministri Zemaj.

Kurse, drejtori i IKSHPK-së, Naser  Ramadani, ka bërë sërish apel që masat e ndërmarra nga ta të respektohen nga qytetarët. Nga aty, drejtori Ramadani tha se nëse nuk respektohen këto masa mund të ketë më shumë viktima nga Coronavirusi.

“Kalimi i lirë i kufirit nuk nënkupton rrezikimin e qytetarëve të Kosovës dhe Shqipërisë, por duke u mbrojtur dhe duke rekomanduar masat, siç janë mbajtja e higjienës dhe distancës. Nëse këto masa nuk ndërmerren këto masa IKSHP do të ndërmarrë masa më rigoroze, deri tek ndalimi i qarkullimit. Kemi menduar se për këto muaj qytetarët kanë kuptuar masat e ndërmarra nga ne”, tha ai.

“Nëse virusi e merr një qytetarët e ka pasojat e njëjta siç ishte në fillim. Ne duhet të mësohemi ne normalitetin e ri. Pa maska dhe pa mbajtje të distancës ne mund të kemi viktima”, tha Ramadani.

“Masat e reja flasin për pakujdesi së qytetarëve të cilët nuk po i respektojnë masat, siç janë përdorimi i maskave dhe mbajtja e distancës. Kjo kërkohet që qytetarët të në ndihmojnë neve”, tha ai.