×
  • Lajme
  • Lajme

    Raporti i DASH-it, përmendet arrestimi i Haki Rugovës dhe shuarja e task-forcës anti-korrupsion

    Reporteri
    30 Mars 2021 | 22:53

    Në raportin e Departamentit të Shtetit të SHBA-së përmendet edhe arrestimi i kryetarit të Istogut, Haki Rugovës. DASH ka publikuar një raport për vitin 2020 për të drejtat e njeriut nëpër botë, duke përpiluar raport për secilin shtet.


    Te pjesa ku flitet për korrupsionin dhe mungesën e transparencës në Qeveri, DASH ka përmendur rastin e Rugovës.

    “Më 9 tetor, Policia arrestoi Haki Rugovën, kryetar i Istogut nga radhë e LDK-së dhe një nga nënkryetarët e partisë, së bashku me zëvendësin e tij dhe një nëpunës civil komunal si pjesë e një hetimi për korrupsion. Pasi Rugova u vendos fillimisht në paraburgim, gjykata përfundimisht urdhëroi arrest shtëpiak prej 30 ditëve për Rugovën. Të tre personat u akuzuan për shpërdorim të detyrës, konflikt interesi dhe falsifikim të dokumenteve të lidhura me një kontratë që Komuna ia dha vëllait të kryebashkiakut. Rugova po i nënshtrohej një gjykimi në një çështje tjetër nën akuza për konflikt interesi. Në komentet publike, lideri i LDK-së, Isa Mustafa, pretendoi për motivime politike prapa arrestimit, duke deklaruar se ka për qëllim diskreditimin e Rugovës dhe partisë dhe njollosjen e punës së Qeverisë Hoti”, thuhet në raportin e DASH-it për vitin 2020.

    DASH po ashtu ka cekur edhe shuarja e task-forcës anti-korrupsion brenda Policisë së Kosovës nga ish-kryeministri Avdullah Hoti.

    “Sipas Kryeministrit ishte thënë se vendimi origjinal ishte anti-kushtetues, po as Policia e Kosovës e as Gjykata Kushtetutese nuk u këshilluan për këtë çështje. Vendimi nuk ishte i koordinuar me koalicionin qeverisës atëbotë dhe as bashkësinë ndërkombëtare. Në media ishte thënë se vendimi erdhi pas arrestimit të Haki Rugovës”, thuhet në raportin e DASH-it.

    Në këtë pjesë të raportit të e DASH-it flitet edhe për gjykimin e ish-ministrit të Bujqësisë, Nenad Rikalo dhe shtatë zyrtarëve të Ministrisë së Bujqësisë të akuzuar për abuzim të pushtetit.

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!