Dhjetë raste të reja me coronavirus janë shënuar edhe sot në Prishtinë dhe kjo ka bërë që kryeqyteti të futet në telashe, shkruan Reporteri.

Kryetari i Prishtinës, Shpend Ahmeti duket se nuk është aspak i kënaqur me sjelljen e qytetarëve karshi coronavirusit, tash pas lehtësimit të masave.

Dhjetë rastet e reja sot në Prishtinë kanë bërë që në komunë të mendojnë për disa masa kufizimi dhe të paralajmërojmë se do të ketë masa shtesë nëse vazhdon mos respektimi i distancës, maskave. Ahmeti ka shkruar në Facebook, duke thënë se dy çerdhe do të mbyllen dhe do të dezinfektohen.

Postimi i Ahmetit:

Tanimë kemi më shumë informata rreth dhjetë rasteve në Prishtinë. Fatkeqësisht, papërgjegjësia e individëve dhe qasja shpërfillëse ndaj rrezikut na ka shkaktuar telashe më të mëdha.

Duke anuar kah kujdesi, nesër çerdhet Lulevera, Xixëllonjat, dhe Buzëqeshja mbyllen dhe urdhërohet dezinfektimi i plotë. Po ashtu do të kontaktojmë me të gjithë që mendojmë se mund të jenë në rrezik nga infeksioni.

Dy mësime shume të rëndësishme:
1. Mos e fshehni semundjen nga të tjerët;
2. Mos e shpërfillni virusin si të parëndësishëm.
Nesër gjatë ditës do të ju informojmë për masat shtesë.