Ministri i Punës dhe Mirëqenies Sociale, Skender Reçica, javën e kaluar ishte në vizitë zyrtare në Shtetet e Bashkuara të Amerikës, ai ishte i shoqëruar nga ambasadorja e Kosovës atje, Vlora Çitaku, ata u takuan me Paul Pfeuffer nga Zyra për Çështje të Evropës Qendrore dhe Jugore.

Në takim u diskutuan dhe u vlerësuan veprimet rreth reformave të ndërmarra nga MPMS, përmbylljes së infrastrukturës ligjore dhe fillimit të zbatimit të tyre, si dhe përmbushjes së obligimeve të MSA-së.

Gjithashtu mes bashkëbiseduesve u fol edhe për zhvillimet politike në Kosovë.

Gjatë qëndrimit në SHBA, Reçica zhvilloi edhe një takim me Kevin Willcutts nga Departamenti Shtetëror i Punës.

Temë diskutimi ishte puna e rëndë te fëmijët, posaçërisht format e këqija të punëve të fëmijëve.

Nga Departamenti Shtetëror i Punës u zotuan për të mbështetur Kosovën nëpërmjet formave të bashkëpunimit si, trajnime për Inspektoratin e Punës, për Qendrat për Punë Sociale, policinë dhe organet tjera, me qëllim të parandalimit por edhe të trajtimit të duhur të punëve të rënda tek fëmijët si dhe ato rreth trafikimit.