Në temperatura të ftohta, shumë pjesë të Kosovës po përballen me reduktime të energjisë elektrike. Qyteti i Ferizajt, Lipjanit, Gjakovës, Malishevës, Gjilanit, Shtimes, Istogut dhe Prizrenit, janë zonat më të afektuara nga ndërprerja e energjisë elektrike.

Ndalja e energjisë elektrike po thuhet të jetë për arsye të mbingarkesës për shkak të konsumit të lartë të energjisë elektrike nga ana e konsumatorëve në këto kohë, pas motit me temperatura të ulëta.

Mungesa e energjisë ka nxitur reagime të shumta të opozitës, shoqërisë civile dhe qytetarëve.

Vetë kryeministri Kurti gjatë ditës së djeshme është përballur me indinjatën e një qytetari rreth kësaj çështje.  Ky mërgimtar i cili ka ardhur në Kosovë për festat e fundvitit, iu ankua kryeministrit Albin Kurti për mungesën e energjisë elektrike.

“Jem në gjendje të mjerueshme, jem në gjendje lufte”, tha ai, ndërsa nga Kurti mori përgjigje se “s’mund të bëjmë zgjidhje menjëherë”.

“I kemi dhënë prioritet kësaj pune. Prej 2007 ka qenë në plan por nuk është realizuar deri tash. Tash i kemi dhënë prioritet. Por nuk mund ta bëjmë përnjëherë, për shkak se është rritur ngarkesa”, tha Kurti të mërkurën.

Kurse Ministria e Ekonomisë,  të mërkurën ka njoftuar se mbrëmë vonë ka mbajtur takim të përbashkët me KOSTT dhe KEDS për të trajtuar situatën e furnizimit me energji elektrike pasi që qytetarët e disa komunave të Kosovës kanë raportuar ankesa gjatë ditëve të fundit.

Ministria është arsyetuar për mungesën e energjisë elektrike duke thënë se, “zakonisht kohët e festave të fundvitit karakterizohen me rritje të madhe të konsumit të energjisë elektrike, prandaj janë kritike sa i përket sigurisë së furnizimit”.

Ministria e Ekonomisë tha se sistemi ynë elektro-energjetik është ngarkuar tej mase, duke shkaktuar vështirësi teknike në furnizim dhe duke e rrezikuar rrjetin; kësisoj, ka qenë e domosdoshme që operatorët të bëjnë shkyçje në disa vendbanime ku ngarkesa ka qenë e papërballueshme për rrjetin”

Nga kjo Ministri kanë bërë thirrje që të shfrytëzohen burimet alternative për ngrohje si druri ose peleti.

“Lusim qytetarët që aty ku është e mundur të përdorin burime alternative për ngrohje si druri ose peleti, si dhe të zhvendosin konsumin e energjisë elektrike pas mesnatës”, u tha në apelin e tyre.

Një nga komunat më të prekura nga reduktimet e energjisë elektrike është Ferizaj. Kryetari i kësaj komune Agim Aliu, ka  thënë mbrëmë se Ferizaj po përballet me mungesë të pashembullt të energjisë elektrike.

“Ditëve të fundit e veçanërisht sot, Ferizaj po përballet me gjendje të pashembullt e të pa ndodhur më parë sa i përket furnizimit me energji elektrike. Vetëm sot, mbi 5 orë pa rrymë i gjithë Ferizaj, e kjo gjendje po vazhdon edhe tani. Në terr familjet, në terr mërgimtarët që kanë zgjedhur të kalojnë festat me familjarët e tyre në vendlindje, në terr bizneset që po humbin mijëra euro çdo orë nga dëmet që sjell mungesa e energjisë elektrike”, ka shkruar Aliu në Facebook.

Zëdhënësi i KEDS-it, Lulzim Krasniqi  të martën për gazetën online Reporteri.net, tha sese mbingarkesa po shkakton këto telashe dhe një pjesë e konsumatorëve po ballafaqohen me këtë, e madje po rrezikohen edhe asetet, duke çuar deri në djegjen e tyre.

“Rritja tej mase e konsumit të energjisë elektrike ka shkaktuar një varg mbingarkesash në shumë pjesë të Kosovës. Mbingarkesa, si e tillë, po shkakton telashe në disa zona kyçe. Si rrjedhojë, një pjesë e konsumatorëve janë duke u ballafaquar me sfidë të furnizimit me energji elektrike, pasi po rrezikohen asetet dhe po vjen deri te djegia e tyre që, si pasojë, konsumatorët po mbesin për një kohë pa energji elektrike deri në zëvendësimin e aseteve, ku në raste të caktuara përfshijnë kabllot e deri te transformatori”, tha Krasniqi për Reporteri.net.

Ferizaj dhe fshatrat përreth qe dy ditë me reduktime të mëdha, KEDS-i: Ka mbingarkesë, qytetarët ta kursejnë maksimalisht rrymën

Ministria e Ekonomisë gjatë vitit 2022, dhe në muajin shtator të viteve 2023 dhe 2024 kishte  hapur thirrjet për subvencionimin në pajisjet efiçiente të ngrohjes./Reporteri.net/