Përballë njeriut që mori 63 % të votave në Serbi, do jetë njeriu që mori së fundmi në Kosovë vetëm 26 mijë e 94 vota.

Ky nuk është dallimi i vetëm midis kryeministrit kosovar, Avdullah Hotit dhe presidentit serb, Aleksandar Vuçiq në përballjen e cilësuar si historike në Shtëpinë e Bardhë, më 4 shtator.

Serbi ka edhe 3 dekada përvojë politike në periudhat më vendimtare për vendin e tij, derisa kosovari deri vonë nuk kishte pozitë të lartë as në parti.

E krahas Hotit, për përvojë politike nuk shquhen as dy zëvendëskryeministrat që i mori me vete, Driton Selmanaj e Albulena Balaj, e as ministrat, Meliza Haradinaj- Stublla, Selim Selimi e Arban Abrashi. Përjashtimin e bën vetëm koordinatori i dialogut, Skender Hyseni, i angazhuar që nga vitet e 90-ta.