Presidentja e vendit, Vjosa Osmani, ka shkuar në pritjen e organizuar nga kryeministri spanjoll, Pedro Sanchez, në kuadër të Samitit të BE-së që po organizohet në Granada të Spanjës. Sanchez, në këtë organizim, do t’i presë edhe liderë të tjerë që ishin pjesëmarrës në këtë samit.

Ndërkohë, gazeta online Reporteri.net ka siguruar pamje kur shefja e shtetit, e shoqëruar nga Zotëriu i Parë, Prindon Sadriu, mbërrin në pallatin La Alhambra, ku do të mblidhen liderët evropianë. Ajo është pritur nga Kryeministri Sanchez dhe bashkëshortja e tij, María Begoña Gómez Fernández.

Kujtojmë se, paraprakisht, shefja e shtetit është takuar me kryeministrin britanik, Rishi Sunak, me kancelarin e Gjermanisë, Olaf Scholz, kryeministrin e Greqisë, Kyriakos Mitsotakis, dhe Presidentin e Francës, Emanuel Macron, me të cilët zhvilloi biseda, siç tha ajo, të frytshme. Atyre u ka kërkuar që Serbia të sanksionohet për sulmin terrorist ndaj Kosovës. /Reporteri.net/.