Në Kuvendin e Kosovës është debatuar mes pozitës dhe opozitës lidhur me seancën e jashtëzakonshme për zgjedhjen e presidentit të ri të vendit, e cila është thirrur sot për në ora 17:00.

Albulena Haxhiu ka bërë thirrje që deputetët të marrin pjesë në seancën që fillon në ora 17:00, duke theksuar nevojën për arritjen e konsensusit për zgjedhjen e presidentit.

“Është e rëndësishme që të jeni të pranishëm në seancë dhe deri atëherë të shpresojmë që të kemi emra dhe konsensus për president”, ka thënë Haxhiu.

Ndërkohë, deputeti i PDK-së, Arian Tahiri, ka thënë se mungesa e marrëveshjes politike po e dërgon vendin në një situatë të re politike.

“Unë nuk e di ‘zanzibarin’, por e di që Kosova nuk ka pasur kurrë krizë të tillë për zgjedhjen e presidentit. Hera e parë që vendi po shkon në zgjedhje si rezultat i mungesës së konsensusit. Është në kohën kur VV i ka 51%. Dejona Mihali me Albin Kurtin po e krijojnë në vazhdimësi krizën politike”, ka thënë Tahiri.

Haxhiu i tha Tahirit se këtë debat mund ta vazhdojnë në seancën e orës 17:00, ndërsa shtoi se tani “është më e veshtirë se s’ka më pazare, tendera”.

“E vazhdojmë këtë debat në ora 17:00. Natyrisht tash është më e veshtirë se s’ka më pazare, tendera, ambasada, e ju e dini më mirë se unë. E dini më mirë se unë mos më shtini me i përmend”, shtoi Haxhiu.

Nga ana tjetër, deputetja e AAK-së, Time Kadrijaj, ka kundërshtuar thirrjen e seancës së jashtëzakonshme, duke deklaruar se një situatë e tillë nuk ekziston.

“Keni shpikur një ngjarje që nuk ekziston, për të thirrur seancë të jashtëzakonshme për presidentin”, ka thënë Kadrijaj.

/Reporteri.net/