Sekretari i Shtetit të Vatikanit, Kardinali Pietro Parolin mbrëmë ka arritur për një vizitë zyrtare dyditore në Prishtinë.

Ai në aeroportin e Prishtinës është pritur nga Ipeshkvi i Ipeshkvisë së Kosovës, Imzot Dodë Gjergji dhe Zëvendësministri në Ministrinë e Punëve të Jashtme, Anton Berisha, shkruan Reporteri.net.

Berisha i cili ka njoftuar për arritjen e kardinalit Parolin në Prishtinë ka thënë se ka falënderuar Kardinalin për gjithë kontributin historik dhe ndihmën që Vatikani ka dhënë për popullin e Kosovës.

Berisha ndër të tjera ka thënë se shpreson që kjo vizitë dyditore do të thellojë edhe më shumë raportet mes Kosovës e shtetit të Vatikanit.

“Mbrëmë, në aeroportin e Prishtinës, së bashku me ipeshkvin e Kosovës, imzot Dodë Gjergji, kam pritur Sekretarin e Shtetit të Vatikanit, Kardinalin Pietro Parolin.

Duke i shprehur mirëseardhjen, e kam falënderuar kardinalin Parolin për gjithë kontributin historik dhe ndihmën qe Vatikani ka bërë për popullin e Kosovës, duke shpresuar që kjo vizitë dyditore do të thellojë edhe më shumë raportet tona”, ka shkruar Berisha. /Reporteri.net