Biznesmenit Shkëlqim Devolli i është ndërprerë posti diplomatik që pati marrë më 2019 në emër të Republikës së Kosovës, ka njoftuar ministrja në detyrë e Punëve të Jashtme, Donika Gërvalla. Ai qe emëruar Konsull Nderi i Kosovës në Mal të Zi për rrethin konsullor të Rozhajës atë vit.

Vendimi është marrë, siç ka shkruar Gërvalla, si pasojë e dokumenteve të Devollit ku Peja figuron si qytet në Serbi.

Gërvalla ka thënë se kushdo që mohon shtetësinë e Kosovës nuk mund të jetë përfaqësues i Kosovës.

“Zero tolerancë ndaj mohuesve të Republikës së Kosovës. Asnjëherë “Peć, Serbia” por Pejë, Republika e Kosovës. Dje ka marrë fund mandati i z. Shkelqim Devolli si Konsull Nderi i Republikës së Kosovës në Mal të Zi për rrethin konsullor të Rozhajës. Ky vendim i marrë në momentin që jam informuar për këtë rast është i pakthyeshëm. Qëllimi është i qartë, mbrojtja e dinjitetit të Republikës së Kosovës nga çdo përpjekje për mohimin e saj”, ka shkruar ajo në Facebook.

Postimin e Gërvallës e ka shpërndarë edhe kryeministri në detyrë Albin Kurti, i cili ka thënë se Republikën e Kosovës nuk mund ta përfaqësojnë ata që e mohojnë.

“Nuk mund ta përfaqësojnë Republikën ata që e mohojnë atë. Peja është në Kosovë, kurrë në Serbi”, ka shkruar Kurti.