Një person nga rajoni i Gjakovës është lënduar rëndë nga një mjet shpërthyes. 20 vjeçari u dërgua në QKUK me plagë të rënda dhe është duke u trajtuar aty.

Drejtori i Emergjencës në QKUK, Naser Syla ka thënë për gazetën online Reporteri.net se gjendja e viktimës në momentin e pranimit ishte e rëndë dhe i njëjti është transferuar në Mjekësinë Intensive Qendrore.

“Pas trajtimit dhe intervenimit kirurgjik nga ekipa kujdestare në Qendrën Emergjente, pacienti është dërgu në Mjekësinë Intensive Qendrore, për trajtim të mëtutjeshëm. Gjendja e rëndë”, ka thënë Syla.

Si ndodhi rasti?

Nga Policia e Kosovës kanë bërë të ditur për gazetën online Reporteri.net se rasti ka ndodhur mbrëmë pas mesnate.

Sipas policisë, shpërthimi ka ndodhur në shtëpinë e viktimës dhe po ashtu potencohet se sipas hetimeve të para dyshohet se vetë viktima ka shkaktuar shpërthimin.

“Sot, rreth orës 01:20, një mashkull rreth 20 vjeç është dërguar për trajtim mjekësor si pasojë e lëndimeve të rënda të shkaktuara nga një mjet shpërthyes.

Menjëherë në vendngjarje kanë dalë të gjitha njësitë relevante policore, dhe sipas hetimeve fillestare, dyshohet se viktima, aksidentalisht ka shkaktuar shpërthimin e mjetit në shtëpinë e tij, në fshatin Dobrigje-Gjakovë”, ka thënë zëdhënësi i Policisë për rajonin e Gjakovës, Sheremet Elezi.

Prokuroria është duke e hetuar rastin. /Reporteri.net/