Një shtetase iraniane, ka tentuar të dalë nga Shqipëria, duke përdorur pasaportë çeke të falsifikuar.

Sipas Policisë së Shtetit, policia kufitare në Rinas ka arritur të arrestojë në flagrancë shtetasen iraniane pasi e njëjta kishte paraqitur në sportelin e Rinas, biletën e udhëtimit dhe një pasaportë çeke për të cilën punonjësi i Policisë Kufitare ka dyshuar se ishte e falsifikuar.

“Për këtë rast u arrestua në flagrancë shtetasja iraniane L. B., 46 vjeçe, banuese në Teheran, Iran, për veprat penale “Falsifikimi i dokumenteve” dhe “Falsifikimi i letërnjoftimeve, pasaportave ose i vizave”, thuhet në njoftim të policisë .

Pas ekzaminimit në laboratorin e dokumenteve rezultoi se pasaporta ishte e falsifikuar.

Në këtë mënyrë, policia ka sekuestruar pasaportën dhe një dokument tjetër i falsifikuar që iu gjet kësaj shtetaseje.

Sipas policisë, gjatë kontrollit, kësaj shtetaseje iu gjet edhe një leje për qëndrim në Çeki, e cila gjithashtu rezultoi e falsifikuar.