Samiti BE-Ballkani Perëndimor, i cili do të mbahet më 6 dhjetor në Tiranë, është veçanërisht i rëndësishëm në situatën aktuale gjeopolitike, tha Peter Stano, zëdhënës i Bashkimit Evropian.

Duke iu referuar situatës rreth emërimit të Nenad Rashiqit për ministër në Qeverinë e Kosovës dhe njoftimit të Beogradit se do të anulojë pjesëmarrjen në Samit, Stano tha se “interpretimi paraprak i emërimit të djeshëm është se nuk i plotëson të gjitha kushtet të përcaktuara me Kushtetutën e Kosovës”.

Stano tha se pret që institucionet e Kosovës të harmonizojnë procedurat e tyre me kushtetutën, e cila është me rëndësi kyçe për sundimin e ligjit, dhe përsëriti thirrjen e BE-së që serbët të kthehen sa më shpejt në institucionet e Kosovës, për të shmangur përshkallëzime të mëtejshme.

Ai shtoi se vizita e Përfaqësuesit Special të BE-së për dialogun Kosovë-Serbi, Miroslav Lajçak, tashmë është planifikuar dhe se nuk ka të bëjë me këtë rast./Reporteri.net/