Sekretari amerikan i Shtetit, Antony Blinken, ka njoftuar se ka folur sot me Kryeministrin e Shqipërisë, Edi Ramën, për t’i shprehur solidaritetin dhe mbështetjen pas sulmeve kibernetike të 9 shtatorit.

Përmes një postimi në Twitter, Blinken ka thënë se s’do t’i tolerojnë sulmet kibernetike që targetojnë Shtetet e Bashkuara të Amerikës apo aleatët e NATO’s, shkruan Gazeta Online Reporteri.net.

“Fola me Kryeministrin e Shqipërisë, Edi Ramën, për t’i shprehur solidaritetin dhe mbështetjen pas sulmeve kibernetike të 9 shtatorit kundër Shqipërisë. Ne nuk do të tolerojmë sulmet kibernetike që targetojnë Shtetet e Bashkuara apo aleatët tonë të NATO’s”, ka shkruar Blinken.

Spoke with Albanian Prime Minister @ediramaal to express solidarity and support after the September 9 cyberattack against Albania. We will not tolerate cyberattacks targeting the United States or our @NATO Allies.

— Secretary Antony Blinken (@SecBlinken) September 13, 2022

Ndryshe, portali shtetëror e-Albania ishte në shënjestrën e sulmeve kibernetike në mes të korrikut dhe nuk funksionoi për disa ditë.

Qeveria shqiptare e njoftoi publikun se bëhej fjalë për një sulm kibernetik të sofistikuar dhe të sinkronizuar nga jashtë. Njoftimin se prapa sulmit kibernetik qëndronte Qeveria iraniane e bëri kryeministri i Shqipërisë, Edi Rama, në fillim të shtatorit. Më pas, të dy vendet i shkëputën marrëdhëniet diplomatike.

Diplomatët iranianë u larguan nga Ambasada në Tiranë, më 8 shtator, ndërkaq paraprakisht dogjën letrat dhe dokumentacionin në ambientet e Ambasadës.