Komiteti Teknik i ekspertëve është mbledhur ditën e sotme, ndërsa drejtoresha e ISHP Albana Fico, tha se situata globale mbetet e rëndë.

Në takimin e sotëm, anëtarët e komitetit vunë theksin tek vaksinimi i popullatës.

Silva Bino tha se ka një rritje të përdorimit të vaksinës Pfizer, që po i afrohet përdorimit të vaksinës Coronavac e përdorur më herët.

Duke u bazuar në analizën e shifrave, Komiteti i Ekspertëve mendon se me një përkeqësim të lehtë të shifrave, niveli i masave mbetet i njëjtë.

“Ndërkohë në lidhje me vaksinimin, sugjerohet prioritet mbulimi i popullsisë me dozën e parë dhe të dytë për ata që nuk e kanë bërë. Ndërkohë qytetarët mbi 60 vjeç vendoset të bëjnë dozën e tretë jo më herët se 6 muaj pasi kanë bërë dozën e dytë, duke nisur nga data 1 Nëntor I këtij viti. Fëmijët mbi 16 vjeç do të ftohen me konsensusin e prindërve dhe rekomandimin e mjekëve, duke nisur nga data 1 Nëntor. Fëmijët 12-15 vjeç që kanë sëmundje që lidhen me imunitet të ulët, ftohen gjithashtu të vaksinohen”, tha Zv.Ministrja Rakacolli.