Dy të rinj kanë rënë në prangat e policisë të akuzuar për abuzim seksual të një djali 13-vjeçar në Tiranë.

Të arrestuarit janë 20 vjeçari me iniciale V. H., dhe 21-vjeçari me iniciale F. H.

Ndërsa është shpallur në kërkim edhe 45-vjeçari me iniciale B. M., i cili dyshohet se po ashtu abuzoi seksualisht me të miturin.

Ngjarja u zbulua pas denoncimit të një tezes së të miturit për grabitjen e banesës së saj.

Si ndodhi ngjarja?

Të rinjtë dyshohet se abuzuan seksualisht me të miturin duke e ftuar në banesë me preteksin për të luajtur video-game. Më pas të rinjtë kanë realizuar dhe një video me të cilën e kanë shantazhuar se do e publikonin në rrjetet sociale.

Sipas burimeve dy të rinjve i është bashkuar dhe 45 vjeçari. Ata e kanë kërcënuar të miturin dhe i kanë kërkuar një shumë prej 5 mijë eurosh. 13-vjeçari po qëndronte tek tezja e tij dhe të tre personat e kanë kërcënuar dhe i kanë marrë çelësat e shtëpisë, të cilën më pas e kanë grabitur.

Zbulimi i ngjarjes – Pas grabitjes së banesës, tezja e të miturit ka bërë denoncimin në polici, por efektivët kanë vënë re se grabitja ishte kryer pa thyer derën e shtëpisë dhe morën në pyetje familjarët se kush kishte çelës të derës.

Gruaja ka treguar se një çelës të shtëpisë e mbante edhe 13 vjeçari.

Pasi është marrë në pyetje në praninë e një psikologeje, fëmija ka treguar të gjithë skenën e rëndë.