Unioni i gazetarëve të Shqipërisë do ti kërkojë zyrtarisht komisionit të medias në kuvend që të ndërhyjë në mënyrë që qeveria të përfshijë në paketën e ndihmës edhe mediat. Janë 6120 punonjës të medias në Shqipëri me rreth 15 mijë familjarë.

Aleksandër Cipa, kryetar i Unionit ka folur se si paraqitet gjendja e mediave, në këtë situatë, që dihet kur nisi, por nuk dihet kur mbaron, shkruan Top Channel.

”Gjendja paraqitet e vështirë për 6120 punonjësit e medias dhe rreth 15 mijë familjarët e tyre”.

Por sa të papunë parashikohet të dalin nga kjo situatë?

”Ne i kemi kërkuar qeverisë të na përfshijë në skemën e ndihmës, por kanë rënë në vesh të shurdhër. Planin tonë për daljen nga kriza do ta paraqesim në Komisionin e Medias”, tha ai.

“Ne nuk kërkojmë lëmoshë, por suport financiar, siç parashikohet për nëpunësinë në Shqipëri dhe siç veprohet në Itali, Gjermani e Francë me median”.