Në mes të dimrit pa një çati mbi kokë. Ky vit nuk nisi mbarë për Pëllumbesha Braçen. Mëngjesi i ditës së dytë të 2020 i mori shtëpinë.

Banesa private ku jetonte në lagjen “Partizani” të Vlorës u dogj nga zjarri. Shtëpia ishte në pronësi të dajës së saj, i cili ua kishte ofruar si strehë prej një viti.

Me burrin që nuk jeton më dhe djalin e papunë ajo apelon shtetin ti gjejë një strehë ku të fusë kokën.

“Djali e pa zjarrin, unë isha përjashta. Po keni mundësi më ndihmoni. Unë shes bidona. Kam një vit në këtë banesë, është shtëpia e dajës. Po keni mundësi më strehoni” thotë ajo.

Të vetmet të ardhura që siguron për mbijetesë vijnë nga shitja e bidonave plastikë. Apelit për ndihmë i bashkohet edhe komshija e saj.

“I lutem shtetit dhe bashkisë të vënë dorën në zemër dhe ta ndihmojnë në maksimum. Po bëjnë shtëpi të pasurit, ndihmoni fukarenjtë.”