Zbardhen detaje të tjera në lidhje me aksidentin që ndodhi sot në aksin Levan-Tepelenë, ku i plagosur mbeti drejtuesi i mjetit.

Ngjarja ndodhi rreth orës 07:15, në fshatin Buzmadh.

Mësohet se në makinën tip “Honday”, udhëtonte një familje emigrantësh që vinin nga Greqia për të kaluar pushimet në Patos. Bëhet me dije se nga aksidenti mbeti i plagosur Maks Hebeja, drejtuesi i mjetit, ndërkohë që gruaja dhe dy fëmijët fatmirësisht nuk patën dëmtime.

Siç shihet edhe nga pamjet, mjeti pasi ka dalë nga rruga ka përfunduar në një kanal, ndërsa është shkatërruar thuajse e gjitha. Dyshohet se shkak i aksidentit mund të ketë qenë përgjumja e shoferit. Po ashtu mësohet se e gjithë familja është transportuar në spital për të kryerë kontrollet e nevojshme.

Kujtojmë se në fund të qershorit një aksident tragjik i mori jetën një familje shqiptare që kthehej nga Greqia për në Patos, ku viktima mbetën çifti i bashkëshortëve dhe dy vajzat e tyre të mitura.