Kryeministri i Shqipërisë, Edi Rama, në dy vjetorin e vdekjes së Adem Demaçit ka thënë se ai është një hero pa vdekshëm.

“ADEM DEMAÇI ishte fatmirësisht shqiptar, shqiptar i mirë shumë, po mbi të gjitha ai ishte një njeri që dinjitetin e të ngjashmëve të vet e ktheu në mburojë të pakapërcyeshme për plumbin dhe për helmin.”, ka shkruar Rama në rrjetin social Facebook.

Ky është postimi i tij i plotë:

?HOMAZH

« Ma s’pari dhe mbi të gjitha, jam qenie njerëzore; fatmirësisht jam edhe shqiptar »

ADEM DEMAÇI ishte fatmirësisht shqiptar, shqiptar i mirë shumë, po mbi të gjitha ai ishte një njeri që dinjitetin e të ngjashmëve të vet e ktheu në mburojë të pakapërcyeshme për plumbin dhe për helmin. Pse ishte një shqiptar i mirë fare dhe një qenie njerëzore e lartë, që nuk e negocionte ndërgjegjen e vet, ai u bë pishtar i lirisë së ndërgjegjes në rrugëtimin e Kosovës përgjatë errësirës drejt lirisë.
Tre dënime. Tre dekada sfilitëse. Tre ngadhënjime. Habitej e gjithë një botë tek e shihte si i shpërfillte plumbat në rrugët e Prishtinës, torturuesit në birucat e Jugosllavisë apo edhe vetë hijen e vdekjes, e cila më se një herë iu avit në ato biruca. Ai nuk i trembej asaj ndoshta edhe pse me të ishte ndeshur qysh në djep kur mori emrin, që në Bibël e Kuran e mban krijesa që Zoti plazmoi në shëmbëlltyrën e vet!
Ademi lindi në gusht të vitit 1935 aq i brishte, sa prindërit nuk e regjistruan veçse në shkurt të vitit 1936. Por brishtësia e frikshme e ditëardhjes në jetë, atij iu bë butësi shpirtërore brenda koracës së hekurt të karakterit të jashtëzakonshëm, që e ktheu Adem Demaçin në një legjendë të gjallë të lirisë së Kosovës.
Hero i pavdekshëm i popullit të Kosovës në kuptimin më të plotë të fjalës dhe gur i gjallë i sovranitetit kosovar, qysh në kohëra kur as imagjinata më e shfrenuar nuk e rrokte dot mundësinë e realizimit të Kosovës sovrane, baca Adem u nda nga kjo jetë si sot dy vjet më parë, duke na e lënë jetën e tij si një “Bibël” a “Kuran” shqiptarie.
Duke e kujtuar sot në këtë dyvjetor të ndarjes fizike prej nesh, më erdhi në mend dedikimi që përmban novela e tij, « Gjarpërinjtë e gjakut » – e para novelë shqip botuar në Kosovë, më 1958:

« Jo – atyne që janë trima
me ngrehë gishtin e krimit,
por- atyne që janë trima
me zgjatë dorën e pajtimit. »

#TëPAHARRUESHËM?

https://www.facebook.com/edirama.al/photos/a.10151850199621523/10158005380556523/?type=3&__xts__%5B0%5D=68.ARCcwzBRg73-U5iw6djkBe9jLRkuoy2nGPQr-Ey3WluWlT4-fZ3ibdBSYLHXL3m3Y44NJSHfQADHK1z4xsoMWKiieTWeLoN252AkJQpS7CGz8FDsSVqVTiubAhtKJty-RmUEFNH2x7BrqaQK77i4gs-RI3uehD-AKPsbNI0SOXmfib4c9X5BBuE6tqdfg-TbaU_SsFmqnNvk8A5zUwZTN99tDJXlAVrRnm0P2KJF8nyb9kaTmaFEd-r0lI6-ITbZZ9LUvE6LsYPFJMecT6nBxmL4wET8UnTxKx6n6PSAYiLRa89Wap5TlRVzkY15Ux1bhIY6f7nLkuRUBfBK4XcV&__tn__=-R