Deputeti i burgosur, Ervin Salianji, teksa ka shpërndarë një fotografi në mes kanabisit, nga qelia ka apeluar shqiptarët të bëhen sonte pjesë e protestës së paralajmëruar nga PD-ja.

Përmes një postimi në Facebook, Salianji ka shkruar se fotografia e publikuar nga ai, vie nga koha kur “Shqipëria ishte kthyer në Republikën e Narkotrafikut”, raporton gazeta online Reporteri.net.

Sipas tij, ky ishte fillimi i fundit të shtetit ligjor në Shqipëri.

”Mirmëngjes miq! Sot po ju rikujtoj një foto nga denoncimet e mia në opozitë, mes kanabisit në kohën kur Shqipëria ishte kthyer në Republikën e Narkotrafikut! Ky ishte fillimi i fundit të shtetit ligjor në Shqipëri. Kanabizimi i Shqipërisë ishte projekti më fatkeq, pasojat e të cilit po i vuajmë të gjithë sot! Mos e ulni kokën! Reagoni! Mos e pranoni të keqen! Bashkohunëprotestë #7Tetor”, thuhet në postimin e plotë të deputetit.

Ndërkaq, Këshilli Kombëtar i Partisë Demokratike në Shqipëri, ka vendosur se protesta e radhës të mbahet pasditen e sotme në orën 18:00.

PD në reagimin e saj, ka ftuar shqiptarë, që siç thuhet në deklaratë, “të bëhemi të gjithë bashkë në Tiranë, për të reaguar kundër padrejtësive me autor të vetëm Edi Ramën. Mospajtimi me padrejtësinë është mision i çdo qytetari të ndershëm shqiptar. Mospajtimi me të keqen fillon nga Kryeministria dhe shtrihet atë ditë në të gjithë rrugët e Tiranës”.

/Reporteri.net/.