Trupi i një 25-vjeçari shqiptar, i cili ishte shpallur në kërkim prej dy ditësh pas një tentative grabitje që përfundoi në mënyrë të përgjakshme është gjetur në fshatin San Severino di Centola, pranë një fushe sportive.

Pronari i vilës, një 60-vjeçar, sipërmarrës ndërtimi vendas, u paraqit në Prokurorinë e Vallo della Lucania së bashku me avokatin e tij dhe tregoi vendndodhjen e trupit.

Ai po hetohet për vrasje dhe fshehje të një kufome në Foria di Centola, në provincën e Salernos ndërsa ka pranuar se kishte qëlluar me armë zjarri gjatë grabitjes, rreth orës 22:00 të së dielës.

Një nga plumbat goditi për vdekje të riun shqiptar, trupi i të cilit u transportua nga vetë sipërmarrësi në një zonë të largët dhe u fsheh në bimësi, i mbështjellë në një thes.

Karabinierët e Kompanisë Sapri dhe një magjistrat ndërhynë në vendngjarje dhe urdhëruan marrjen e trupit dhe kryerjen e autopsisë, që do të realizohet në spitalin San Luca në Vallo della Lucania ndërsa rezultatet pritet të ndihmojnë në zbardhjen e plotë të ngjarjes.

Një anëtar tjetër i bandës u plagos rëndë dhe është i shtruar në spitalin “Cardarelli” në Napoli. Edhe për këtë rast, pronari i vilës po hetohet për shkaktim të lëndimeve të rënda ndërsa një i tretë, bashkëpunëtor i dyshuar, është ende në kërkim.

Hetimet e koordinuara nga Prokuroria e Vallo della Lucania synojnë të përcaktojnë me saktësi dinamikën e të shtënave dhe të sqarojnë se kush qëlloi i pari.

Gjatë grabitjes është vjedhur edhe një armë, e cila dyshohet se u përdor nga njëri prej grabitësve në shkëmbimin e zjarrit.

Ngjarja ka tronditur komunitetin vendas dhe ka shkaktuar tensione të forta pasi familjarë dhe miq të viktimës, përfshirë gruan e tij dhe vajzën trevjeçare u mblodhën pranë banesës ku ndodhi ngjarja.

Sipas mediave lokale, rreth 30 qytetarë shqiptarë të ardhur nga Caserta janë parë në zonë në atë që përshkruhet si një “ekspeditë ndëshkuese”, por u shpërndanë pas mbërritjes së karabinierëve ndërsa zona vijon të jetë nën mbikëqyrje të rreptë./euronews/