Policia Kufitare në Kavajë ka proceduar penalisht një person i cili tentoi që të korruptonte zyrtarët e Policisë kufitare, duke iu ofruar 50 euro në këmbim të daljes së jashtëligjshme nga Shqipëria.

“Tentoi të korruptonte punonjësin e Policisë Kufitare, për të dalë në mënyrë të parregullt nga Shqipëria, pasi ishte kthyer deportiv nga pala greke, procedohet penalisht 30-vjeçari”, thuhet në njoftim të policisë.

Sipas njoftimit, Policia Kufitare Kakavijë, i kanë kërkuar shtetasit S.D., pasaportën, me qëllim kryerjen e procedurës së regjistrimit, ndërsa S.D. e ka dorëzuar pasaportën me një kartmonedhë 50 euro në brendësi të saj, me qëllim korruptimin e punonjësit të Policisë Kufitare, që ta lejonte të kalonte kufirin në mënyrë të parregullt, duke qenë se shtetasi S. D. ishte kthyer deportiv nga Policia Kufitare e Greqisë.

“Në vijim të veprimeve procedurale për këtë rast, specialistët për Hetimin e Krimeve Ekonomiko-Financiare të Drejtorisë Vendore të Policisë Gjirokastër referuan materialet në Prokurori dhe nisi procedimi në gjendje të lirë për shtetasin S. D., 30 vjeç, banues në Kuçovë, për veprën penale “Korrupsioni aktiv i personave që ushtrojnë funksione publike””, thuhet në njoftim të policisë.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.