Që prej tërmetit të 21 shtatorit, kjo banesë në Pezë është shpallur e pabanueshme, por familja vijon të kalojë netët në këtë çadër.

Prej 3 muajsh, u kërkon autoriteteve një zgjidhje, e cila ende s’ka ardhur.

Shumë banesa në zonën e Pezës dhe të Ndroqit janë të dëmtuara rëndë.

Banorët kërkojnë ekipe të specializuara dhe inxhinierësh, për vlerësimin e dëmeve, transmeton oranews.

“Më kanë luajtur të gjithë muret. Unë kërkoj inxhinier të verifikojë shtëpinë”

Por ka dhe nga ata që nuk mund të lënë shtëpinë e tyre.

“Unë aty do të rri, aty do të vdes, nuk kam ku të shkoj”

Ndërsa në këtë pallat në Kombinat situata paraqitet ndryshe. Inspektorati I Ndërtimit e ka shpallur të pabanueshëm, ndërsa 150 familje që banonin aty, e kanë pranuar fatin e tyre.

“Mund të na zërë brenda sic i zuri në Durrës”

Shfaqin pasiguri për të ardhmen, por shprehen se jeta nuk ka çmim.

“Pse nuk na thanë që radhën e parë të iknim. Edhe sot vënë shiritin dhe ikën. Ku të rrimë, në mes të 4 rrugëve”

“Sa të vdesim më mirë të rrojmë”

Shtëpitë janë kthyer të pa banueshme dhe në fshatin Domje. Në banesën e familjes Selimi është dëmtuar gjithë struktura e katit të parë

“Nuk është bërë verifikimi. Unë kam marrë inxhinier privat dhe thotë që shtëpia është e pabanueshme”

Gjithashtu në fshatin Bubq shumë banesa janë kthyer në të pabanueshme.

Në zonat periferike, dëmet që shkaktoi tërmeti i 26 nëntorit ju mbivendosën atyre të tërmetit të 21 shtatorit, çka ka shtuar frikën tek banorët.