Shefi i shërbimit të Neurokirurgjisë, Fatos Olldashi, ka folur për gjendjen shëndetësore të avokatit, Sokol Mëngjesi, i cili u rrah brutalisht nga katër persona.

Olldashi ka thënë se gjendja e Mëngjesit duket e stabilizuar, por ai vazhdon të jetë i intubuar dhe sipas tij, diskutohet ende për jetën.

Por nëse vazhdon me këto parametra, pra me ulje të edemës që ka në pjesën e përparme të truri , do të tentohet zgjimi i tij ditën e hënë, pra të nxirret nga intubimi, raporton TCH.

Avokati u sulmua mëngjesin e së mërkurës pasi la djalin e tij në kopsht.

Nga katër autorët e dyshuar të sulmit ku tre goditën avokatin dhe njëri i transportoi në pranga ka rënë vetëm një.

Dorian Aliaj u vetëdorëzua mbrëmjen e dy ditëve më parë dhe ka folur para grupit hetimor.

Sipas tij, ai dhe Drivald Alia, Elton Kasaj dhe Romario Tabaku nuk e kishin planifikuar sulmin ndaj avokatit.

Dorian Alia u shpreh se takimi pranë kopshtit 31 ishte i rastësishëm.

Ai pretendon se vetëm e ka përshëndetur avokatin, por kur ky i fundit e ka injoruar e ka qëlluar vetëm një herë me grusht. Kur e ka parë se avokati është rrëzuar është larguar me vrap nga paniku.

Para hetuesve Dorian Aliaj ka treguar dhe për mosmarrëveshjet që miku i tij, Dritan Nano ka pasur me avokatin dhe se nga padia e bërë nga ky i fundit prona ishte bllokuar.

Nga ana tjetër i ndaluari me iniciativë të policisë Dritan Nano, i cili sipas policisë dyshohet si organizator i sulmit ndaj avokatit ka mbajtur qëndrim mohues duke e përjashtuar veten nga kjo ngjarje.

Shkak për konfliktin sipas hetimeve është mosrespektimi i një kontrate lidhur mes avokatit dhe trashëgimtarëve të një prone në zonën e Liqenit artificial.

Pala e përfaqësuar nga avokati fitoi gjyqin në të 2 shkallët e gjyqësorit por një prej 8 trashëgimtarëve, Dritan Nano nuk pranonte të likuidonte avokatin sipas kontratës çka solli bllokimin e pjesës takuese të tij.

TCH raporton se dhe para sulmit Dritan Nano e ka kërcënuar avokatin që të hiqte dorë nga padia që i kishte bllokuar pronën sepse në të kundërt do ta pësonte.