Vitia e ka një stacion të autobusëve. Megjithatë, të paktë janë udhëtarët që presin aty.

Objekti nuk është funksionalizuar, megjithëse Komuna kishte investuar në ndërtimin e tij dhe nuk menaxhon me të.

Kompanitë që merren me transportin e udhëtarëve ankohen se mosfunksionalizimi i objektit po sjell telashe për udhëtarët.

Nënkryetari i Komunës së Vitisë, Hasan Aliu, deklaron se ata nuk kanë kapacitete që të themelojnë ndërmarrje lokale që merret me organizimin e transportit dhe menaxhimin e aseteve, raporton KOHA.

Sipas tij, ndërmarrja “Stacioni i Autobusëve” në Gjilan ka kapacitet në këtë fushë të transportit, por propozimi i tyre nuk po përkrahet nga opozita, e cila është shumica në Kuvendin Komunal të Vitisë sa u përket numrave.

Ndërkaq, opozita në Viti, e përbërë nga PDK-ja, Vetëvendosje dhe AAK-ja, ka deklaruar se nuk ka përkrahur propozimin e qeverisjes komunale, ngase nuk duan që me asetet publike të Vitisë të menaxhojë një komunë tjetër.

/Reporteri.net/