Banorët e fshatit Semetisht të Suharekës, fshat i cili kufizohet me komunën e Malishevës, kanë vendosur një barrikadë në rrugë për të penguar banorët e komunës fqinje që të mos hyjnë ilegalisht në komunën e tyre.

Malisheva është komuna me numrin më të madh të të prekurve me coronavirus, dhe kjo komunë është ndër të parat në Kosovë që është karantinuar. Por, pavarësisht kësaj, banorët e kësaj komune kanë vazhduar të lëvizin nëpër komunat tjera, sidomos në ato fqinje, si Rahovec e Suharekë, duke gjetur rrugë alternative të cilat nuk janë të bllokuara nga policia.

Për të penguar lëvizjen e këtyre qytetarëve, banorët e fshatit Semetisht të Suharekës, kanë vendosur një rimorkio traktori si barrikadë në njërën nga rrugët të cilën banorët e Malishevës e shfrytëzonin për të hyrë ilegalisht në Suharekë.

Për këtë ka folur edhe kryetari i komunës së Suharekës, Bali Muharremaj, i cili në një prononcim për Klan Kosova, ka thënë se ajo barrikadë është vendosur aty përkohësisht, shkaku i ndërprerjes së përhapjes së epidemisë.

Suhareka dje ka shënuar edhe rastin e pestë me coronavirus, dhe nga sot është marrë vendim që edhe kjo komunë të futet në karantinë. /Reporteri.net