Një zyrtar policor sot ishte kapur nga kamerat e mediave, duke pirë birrë në një lokal derisa ishte në detyrë dhe me uniformë. Pas raportimit të rastit në media, policia ka bërë të ditur se e ka suspenduar nga puna këtë zyrtar.

Në njoftimin e policisë thuhet se zyrtari policor që me pozitë është rreshter, bazuar në udhëzimin administrativ, është suspencuar nga puna.

“Policia e Kosovës, mbështetur në udhëzimin administrativ mbi shkeljet, masat dhe procedurat disiplinore, pas dyshimit të arsyeshëm, ka suspenduar një rreshter policor. Suspendimi i këtij rreshteri policor është bërë mbi arsyen se i njëjti ka rënë ndesh me udhëzimin administrativ të lartcekur, me ç’rast i njëjti gjatë orarit të punës ka dalur në një lokal në Prishtinë”, thuhet në njoftimin e Policisë së Kosovës.

Tutje në njoftim thuhet se ushtrimi i detyrave i është ndaluar këtij polici për 48 orë.

“Andaj pas shkeljes së bërë, këtij rreshteri policor i është ndaluar ushtrimi i detyrave policore për 48 orë. Policia e Kosovës u është mirënjohëse të gjithë gazetarëve dhe mediave për bashkëpunimin e treguar me PK-në, bashkëpunim ky, i cili reflekton edhe në performancën dhe transparencën e Policisë së Kosovës”, thuhet në fund të komunikatës së policisë. /reporteri.net