Ish-negociatorja për Dialog e Kosovës, Edita Tahiri, vlerëson se sanksionet ndaj anëtarit serb të Presidencës së Bosnjës e Hercegovinës, Milorad Dodik janë goditje mbi planet serbo-ruse për formimin e “Serbisë së Madhe”.

“Shtetet e Bashkuara të Amerikës kanë vënë sanksione të reja ndaj Dodik për të parandaluar ndarjen e Bosnjës”, është shprehur Tahiri.

“Kjo është një goditje direkte mbi planet e Serbisë dhe Rusisë për krijimin e Serbisë së Madhe”.

Dje, Departamenti amerikan i Thesarit ka njoftuar për zgjerimin e sanksioneve për vepra korruptive, në të cilat është përfshirë anëtari serb i Presidencës së Bosnje e Hercegovinës, Millorad Dodik.

Siç thuhet në njofim, sanksionet janë vendosur edhe ndaj Televizionit ‘Alternativa’ nga Banja Lluka, që ndërlidhet me familjen e Dodikut.

Departamenti i Thesarit tha se sanksionet shprehin përkushtimin e administratës së presidentit amerikan, Joe Biden, për të promovuar llogaridhënien “për ata, që mes tjerash, minojnë stabilitetin e rajonit të Ballkanit Perëndimor përmes korrupsionit dhe kërcënimeve ndaj marrëveshjeve afatgjata të paqes”.