Kryeministri i Kosovës në detyrë, Albin Kurti ka reaguar pas takimit të kreut të Kishës Ortodokse Serbe Porfirije  me presidentin e Rusisë, Vladimir Putin.

Sipas Kurtit Patriarku bëri thirrje për një riorganizim më të gjerë gjeopolitik nën udhëheqjen ruse duke e bërë të ditur se Rusia dhe Serbia duhet të jenë gjithmonë bashkë.

“Një zhvillim shqetësues doli nga takimi i djeshëm ndërmjet Patriarkut të Kishës Ortodokse Serbe dhe Vladimir Putinit në Moskë. Kisha Ortodokse Serbe ka luajtur prej kohësh një rol aktiv politik, por përputhja e qartë në transkriptin e takimit është zbuluese—sidomos përpara vizitës së Aleksandar Vuçiqit në maj. Patriarku bëri thirrje për një rreshtim më të gjerë gjeopolitik nën udhëheqjen ruse, duke përsëritur se ‘barka e vogël serbe, që lundron në det të trazuar, duhet gjithmonë të jetë e lidhur me anijen e madhe ruse’. Ai gjithashtu sugjeroi se qëndrimi i Serbisë ndaj fqinjëve të saj—Kosovës, Bosnje e Hercegovinës dhe Malit të Zi—është i varur nga pozicioni global i Rusisë.”, ka shkruar Kurti, shkruan gazeta online Reporteri.net.

Sipas tij kjo nuk është diplomaci fetare, por një partneritet strategjik mes regjimeve autoritare, që e vendos rajonin në rrezik serioz.

“Kosova, megjithatë, qëndron e palëkundur në parimet dhe aspiratat e saj demokratike dhe i refuzon në mënyrë të prerë agjendat revizioniste të nxitura nga fuqitë autoritare.”, ka shkruar ai.

A concerning development emerged from yesterday’s meeting between the Serbian Orthodox Patriarch and Vladimir Putin in Moscow. The Serbian Orthodox Church has long played an active political role, but the explicit alignment in the meeting’s transcript is revealing—especially…

— Albin Kurti (@albinkurti) April 24, 2025

Porfirije, përveç falënderimeve ndaj Putinit për mbështetjen, foli edhe për Kosovën, Republikën Srpska dhe Malin e Zi, duke thënë se qëndrimi i Serbisë varet nga qëndrimi i Rusisë.

Dënimi i “revolucionit me ngjyra” dhe “pushteteve perëndimore”, bashkë me dëshirën që Serbia t’i bashkohet botës ruse, ishin mesazhet që kreu i kishës ortodokse serbe, Porfirije, ia përcolli presidentit të Rusisë, Vladimir Putin.