Menjehërë pas përgjigjes së Gjykatës Kushtetuese për dekretin e presidentit për krijimin e qeverisë së re, partitë që tashmë kanë krijuar koalicion për bashkëqeverisje, LDK, AAK dhe Nisma kanë nisur përzgjedhjen e emrave të qeverisë së re, e cila do të jetë nën udhëheqjen e Avdullah Hotit.

Qeveria e re e cila pritet të votohet të mërkurën, ka emra të rinj për pozitat e ministrave. Seanca për votimin e Qeverisë Hoti pritet të mbahet të mërkurën në ora 11:00, ndërsa kryetari i LDK-së, Isa Mustafa ka bërë të ditur se nesër do të mblidhet kryesia e partisë, nga ku edhe do të deklarohen për emrat e ministrave.

Sipas burimeve të Reporteri.net, Lidhja Demokratike e Kosovës do të rikthejë Agim Veliun në Ministrinë e Punëve të Brendshme, dhe disa nga emrat që ishin ministra në qeverinë Kurti, do të ndërrojnë ministritë. Madje, ka të atillë që nga pozita e ministrit kalon në zëvendëskryeministër.

Këta janë të përmendurit për ministra dhe zëvendëskryeministra nga radhët e Lidhjes Demokratike të Kosovës:

Hykmete Bajrami – Zëvendëskryeministre

Vlora Dumoshi – Ministre e Kulturës

Arban Abrashi – Ministër i Infrastrukturës

Armend Zemaj – Ministër i Bujqësisë

Agim Veliu – Ministër i Punëve të Brendshme

Besian Mustafa – Ministër i Integrimeve Evropiane

Valbon Krasniqi – Ministër i Shëndetësisë

Lumir Abdixhiku – Ministër i Financave

Edhe nga radhët e Aleancës për Ardhmërinë e Kosovës, do të ketë emra të rinj të ministrave për Qeverinë Hoti:

Besnik Tahiri – zëvendëskryeministër

Meliza Haradinaj – Stublla – Ministre e Jashtme

Selim Selimi – Ministër i Drejtësisë

Ramë Likaj – Ministër i Arsimit

Blerim Kuqi – Ministria për Ekonomi, Punësim, Tregti, Inovacione, Ndërmarrësi dhe Investime Strategjike

Ministria e Tregtisë dhe Industrisë, dhe ajo e Punës dhe Mirëqenies Sociale janë ministritë që pritet t’i drejtojë Nisma Socialdemokrate në qeverinë Hoti.

Ministrat e propozuar nga Nisma janë Skënder Reçica që do drejtojë dikasterin e Punës dhe Mirëqenies Sociale, ndërsa Vesel Krasniqi atë të Tregtisë dhe Industrisë.

Qeveria Hoti është paraparë t’i ketë 16 ministri dhe përveç ministrive nga partitë shqiptare, ministri do të kenë edhe serbët dhe minoritetet e tjera, shkruan Reporteri.net.

Në anën tjetër, sot Gjykata Kushtetuese ka publikuar vendimin e plotë për kushtetutshmërinë e dekretit të Presidentit Thaçi për mandatimin e Avdullah Hotit për Kryeministër.

Kushtetuesja i ka hapur rrugë krijimit të Qeverisë Hoti, pasi vlerësoi se partia e dytë e dalë nga zgjedhjet ka mundësi që të krijojë institucionet e reja qeveritare, pas votimit të një mocioni mosbesimi ndaj Qeverisë.

Po ashtu, Kushtetuesja pohon se Lëvizja Vetëvendosje, e cila çoi lenden në këtë Gjykatë, me mos përgjigjen e Presidentit për mandatarin mund të konsiderohet se ka refuzuar të marrë mandatin e ri për krijimin e qeverisë së re. /Reporteri.net/