Policia e Kosovës në një përgjigje për gazetën online Reporteri.net, ka njoftuar për të shtëna me armë në një pikë derivatesh në lagjen “Arbëria” në Prishtinë.

Sipas policisë, në këtë rast nuk ka ndonjë person të plagosur.

“Sot rreth orës 19:30, kemi marrë informatën për të shtëna me armë zjarri në afërsi të një pompe derivatesh, në Prishtinë. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme”, thuhet në njoftimin e policisë.

“Bazuar në të dhënat e deritanishme në këtë rast nuk ka ndonjë person të lënduar. Hetuesit policor në koordinim me prokurorinë, po ndërmarrin veprimet hetimore për ndriçimin e plotë të rastit, ndërkohë që prezenca e njërit prej personave të përfshirë në rast është siguruar nga ana e policisë”, thuhet në njoftim.