Myftiu Naim Tërnava gjatë një takimi që pati me një delegacion të Shoqatës Ndërkombëtare të Ulemave Mysliman (UMAD) nga Turqia i ka çuar selam organizatës që po e financon ndërtimin e xhamisë në Ulpianë. Takimi me UMAD ka ndodhur më 9 qershor ndërsa leja për ndërtimin e xhamisë është lëshuar sot nga Komuna e Prishtinës.

Në komunikatën e BIK-ut thuhet se gjatë këtij takimi, myftiu Tërnava bëri një falënderim të veçantë për organizatën Dijanetin që po mundëson ndërtimin e Xhamisë Qendrore në Prishtinë dhe gjithë përkrahjen deri tani në të gjitha etapat.

Në këtë takim, prof.dr Abdulvehab Ekinxhi nga UMAD falënderoi Tërnavën për pritjen dhe tha se ndjehet i kënaqur që sot gjendet për vizitë në Kosovë.

“Ai tha se ne nuk kemi ndarje të kufijve shpirtëror edhe pse kemi ndarje gjeografike, të ndihmohemi në devotshmëri e bamirësi dhe në të mirë të dy popujve” thuhet në komunikatë.

Ndryshe, sot pas 10 vjetëve është lëshuar leja nga Komuna e Prishtinës për ndërtimin e Xhamisë Qendrore.

Kryetari i komunës së Prishtinës, Përparim Rama, tha se janë të gëzuar që më në fund e kanë vënë në “binar” ndërtimin e xhamisë.