Kamionë, pajisje të rënda dhe instrumente për matje gjeodezike janë parë  sot ( e martë) mbi Urën e Ibrit në Mitrovicë. Ndërkohë, Qeveria në detyrë ka deklaruar se nuk ka asnjë informacion zyrtar për testimet që po kryhen aktualisht.

Zëvendësministri në detyrë i Infrastrukturës, Hysen Durmishi, ka thënë se Ministria e Mjedisit, Planifikimit Hapësinor dhe Infrastrukturës (MMPHI) e ka përfunduar testimin teknik të urës që vitin e kaluar dhe ka marrë një raport që vërteton se ura është në gjendje të mirë dhe e sigurt për kalim.

“Ne si ministri i kemi përfunduar testimet vitin e kaluar dhe e kemi pranuar raportin përfundimtar që ura është stabile për kalimin e të gjitha ngarkesave mbi të. Nuk jemi duke kryer asnjë testim aktualisht dhe nuk jemi të informuar se kush po i kryen ato testime në urë,” tha Durmishi për Kohën.