Vjosa Osmani, ndonëse si ushtruese e detyrës, bëhet gruaja e dytë, brenda pak vitesh, që ulet në karrigen e Presidentit të Kosovës.

Nuk janë bëre ende 5 vite që kur Atifete Jahjaga, Presidentja e parë grua, i dorëzoi Hashim Thaçit mandatin e Presidentit.

Jahjaga, si Presidentja e 3-të e shtetit të Kosovës, dhe e para grua në këtë post, më 7 Prill 2011 e kishte marrë këtë detyrë, pasi ishte zgjedhur Presidente e Kosovës, me vota në Kuvend.

Përveç se e para grua, Jahjaga, ishte edhe presidentja e vetme jopartiake që u bë shefe e shtetit, shkruan Reporteri.net.

Pesë vite më vonë, me të përfunduar mandatin e plotë, Jahjaga më 7 Prill 2016 i kishte dorëzuar detyrën Hashim Thaçit, që u zgjodh president.

Për dallim nga ish-Presidentja jo politike, Thaçi që sot u dorëhoq nga posti i Presidentit, pa e përfunduar mandatin e plotë, për shkak të një aktakuzë të ngritur nga Haga, për krime lufte, deri në zgjedhjen e tij President kishte drejtuar PDK’në, si themelues i saj.

Ish-presidenti, që sot la karrigen e të parit të shtetit, për maksimalisht 6 muaj do të pasohet nga një tjetër grua, shkruan Reporteri.net.

Kryeparlamentarja Vjosa Osmani, që ndonëse aktualisht është pa parti politike, e ka marrë në ushtrim detyrën e Presidentit, pasi një gjë të tillë parasheh Kushtetuta e vendit.

Ish-kandidatja e LDK’së për Kryeministre, sipas Kushtetutës, për më së shumti 6 muaj, deri nga zgjedhja e Presidentit të ri të vendit nga Kuvendi i Kosovës, i mbanë të dy pozitat e larta institucionale.

Për dallim nga Thaçi që në prill të 2016 detyrën ia dorëzoi personalisht ish-Presidentja Jahjaga, Osmani detyrën e pranoi nga një këshilltar i ish-Presidentit Thaçi. /Reporteri.net/.