Presidenti i Republikës së Kosovës, Hashim Thaçi, ka reaguar pas vdekjes së 82-vjeçarit nga koronavirusi.

Thaçi përmes një postimi në Facebook, u ka shprehur ngushëllime familjes nga Dumnica e Podujevës dhe njëkohësisht ka falenderuar përkushtimin e Institucioneve shëndetësore, shkruan Reporteri.net

Ndër të tjera Thaçi u ka bërë thirrje qytetarëve të qëndrojnë në shtëpi, duke i zvogëluar mundësitë e përhapjes më të madhe të këtij virusi.

“Ngushëllimet më të sinqerta për familjen nga Dumnica e Podujevës, anëtari i së cilës është viktima e parë e virusit COVID-19 në Kosovë. Institucionet shëndetësore i falënderoj për përkushtimin, vendosmërinë dhe profesionalizmin që po tregojnë në këto rrethana të rënda. Ne duhet t’i ndihmojmë mjekët, duke qëndruar të mbyllur në shtëpitë tona dhe duke i zvogëluar mundësitë e përhapjes më të madhe të këtij virusi. Institucionet e shtetit duhet të jenë të gatshme, që në rast nevoje të shpallet menjëherë Gjendja e Jashtëzakonshme. Duke punuar së bashku do ta tejkalojmë edhe këtë sfidë”, ka shkruar Thaçi.