Theret një nxënës tek shkolla ‘Ismail Qemali’ në Prishtinë

Disa nxënës të shkollës fillore ‘Ismail Qemali’ në kryeqytet janë përleshur fizikisht, me ç’rast njëri nga nxënësit është therur me thikë nga shoku i shkollës.


Zëdhënësi i Policisë së Kosovës, Agron Borovci, bën të ditur për Gazetën Online “Reporteri.net” se ngjarja ka ndodhur rreth orës 15:00 dhe viktima është dërguar për trajtim mjekësor në QKUK.

“Rreth orës 14:45 është raportuar për një lëndim trupor të ndodhur në afërsi të shkollës fillore “Ismail Qemali” në Prishtinë. Policia menjëherë ka dalë në vendin e ngjarjes prej nga viktima është dërguar në QKUK për trajtim mjekësor. Ndërkohë që ka shoqëruar në stacionin policor një të mitur që dyshohet të ketë shkaktuar lëndimin trupor të viktimës me një mjet të mprehtë. Aktualisht policia ka iniciuar në hetim lidhur me rrethanat që karakterizojnë ngjarjen.”, tha Borovci për Reporterin. /Reporteri.net