Lëvizja Vetëvendosje dhe Lidhja Demokratike e Kosovës nuk kanë arritur një marrëveshje për koalicion qeverisës para konstituimit të përbërjes së re të Kuvendit të Kosovës, që u bë gjatë ditës së djeshme.

Pas konstituimit të legjislaturës së shtatë të Kuvendit të Kosovës, mbetet i paqartë fati i qeverisë.

Gjatë ditës u raportua se, Presidenti i Kosovës, Hashim Thaçi, do ta mandatojë sot për kryeministër, kandidatin e Lëvizjes Vetëvendosje, Albin Kurtin. Mirëpo, kjo nuk mund të bëhet pa propozimin e partisë politike ose koalicionit që përbën shumicën në Kuvend, shkruan Reporteri.net.

Këtë e përcakton qartë neni 84 i Kushtetutës së Republikës së Kosovës, i cili thotë:

Presidenti i Republikës së Kosovës:[…] (14) cakton mandatarin për formimin e Qeverisë, pas propozimit të partisë politike ose të koalicionit, që përbën shumicën e Kuvendit; […]

Pra, mbetet në dorë të Vetëvendosjes që ta dërgojë tek presidenti Thaçi propozimin e saj për kryeministër, që në këtë rast do të jetë Albin Kurti. Megjithatë, duhet theksuar se ky vendim varet nga negociatat e partive fituese, Vetëvendosjes dhe LDK-së, të cilat gjatë ditës së djeshme kanë deklaruar se do të vazhdojnë bisedimet për formimin e qeverisë.

Pas nominimit nga presidenti Thaçi, kandidati për kryeministër ka 15 ditë afat ta paraqesë për votim kabinetin në Kuvend. /Reporteri.net