Kryetari i LDK-së, Lumir Abdixhiku i ka dërguar telegram ngushëllime familjes së ish-diplomatit Anton Berisha i cili vdiq sot pas një sëmundje të shkurtër, shkruan Gazeta Online Reporteri.net.

Në telegram thuhet se kontributi i Anton Berishës do të mbetet trashëgimi e rëndësishme në jetën politike e shoqërore.

“Anton Berisha dha një kontribut të jashtëzakonshëm në jetën politike dhe diplomatike të Kosovës që nga viti 1990, ku ishte i autorizuar nga Presidenti Historik Dr. Ibrahim Rugova për misione specifike diplomatike. Si gjeneratë e parë e ambasadorëve, Berisha shërbeu si ambasadori i parë i Kosovës në Slloveni, duke ndihmuar Kosovën në integrim e skenës ndërkombëtare. E pastaj edhe si zëvendësministër i Punëve të Jashtme, këshilltar diplomatik i kryeministrit dhe si person diplomatik kontaktues në Selinë e Shenjtë”, thuhet mes tjerash në telegramin e Abdixhiku drejtuar familjes Berisha.

“Humbja e veprimtarit Anton Berisha është një humbje e thellë edhe për trupën tonë diplomatike dhe shërbimin e jashtëm të Kosovës, ku shërbeu e kontribuoi me devocion dhe profesionalizëm prej dekadash”, shkruan Abdixhiku.

/Reporteri.net/