Një vajzë ka humbur jetën si pasojë e lëndimeve të rënda që mori në një aksident trafiku dy ditë më parë në Drenas, raporton Gazeta Online Reporteri.net.

Rastin e ka konfirmuar Policia e Kosovës përmes raportit 24 orësh, ku bëhet e ditur se viktima po trajtohej në Qendrën Klinike Universitare të Kosovës, por që s’ka arritur që t’i përballojë plagët e marra dhe si pasojë ka vdekur.

“Lidhur me rastin, është raportuar se viktima femër kosovare e cila ka qenë duke u trajtuar në QKUK ka ndërruar jetë. Me urdhër të prokurorit trupi i pajetë u lirohet familjarëve për ceremoni mortore”, thuhet në njoftim.

Siç kanë raportuar mediat, viktima është e mitur dhe në momentin kritik po drejtonte motoçikletën, teksa bashkë me të ndodhej edhe një grua tjetër e cila mbeti e lënduar.