Kryeministri i Republikës së Kosovës, Albin Kurti, ka vizituar sot komunën e Dragashit, e cila u prek dje nga vërshimet e ujit si pasojë e reshjeve të mëdha të shiut, raporton Gazeta Online Reporteri.net.

Përmes një komunikate për media, Zyra e Kryeministrit njofton se Kurti u shoqërua nga ministri i Administrimit të Pushtetit Lokal, Elbert Krasniqi dhe kryetari i Komunës së Dragashit, Bexhet Xheladini.

“Kryeministri Kurti i falënderoi institucionet lokale për angazhimin e tyre dhe ofroi ndihmën e tij dhe të institucioneve qendrore në tejkalimin e rimëkëmbjen nga dëmet e shkaktuara, për të cilat do të ketë vlerësim adekuat nga komisioni përkatës. “Qeveria do të jetë pranë jush dhe pranë qytetarëve”, u shpreh ai.  

Kryetari Xheladini e njoftoi kryeministrin mbi situatën në teren dhe dëmtimet e evidentuara në infrastrukturë, për të cilat tha se ka nevojë për ndërhyrje urgjente dhe falënderoi atë për vizitën dhe ministrin Krasniqi për bashkëpunimin dhe komunikimin e rregullt”, thuhet në njoftim.

Kurti më pas ka vizituar edhe zonat e prekura nga vërshimet e djeshme të shkaktuara nga reshjet e shiut.