Kryetari i Kuvendit, Kadri Veseli ka takuar sot ambasadorin e Gjermanisë në Prishtinë me të cilin ka diskutuar për diskutimet dhe rekomandimet e dala nga Samiti i Berlinit, i mbajtur dje.

Veseli, përmes një statusi në Facebook ka thënë se ky samit ishte një hap para për perspektiven evropiane të Ballkanit. Ai theksoi se procesi i dialogut mes Kosovës dhe Serbisë duhet të rezultojë me njohje.

“Në takim me ambasadorin e Gjermanisë në Kosovë, Christian Heldt, vlerësuam se Samiti i Berlinit ishte një hap përpara për perspektivën evropiane të Ballkanit, e në veçanti për normalizimin e raporteve mes Kosovës dhe Serbisë.
Ky samit tregoi se, kur ka një vendosmëri dhe seriozitet, mund të ketë edhe rezultate dhe për këtë përgëzoj kancelaren Merkel dhe presidentin Macron.
Shtetet e Bashkuara të Amerikës dhe Bashkimi Evropian duhet të ndërtojnë strategjinë e qasjes për arritjen e Marrëveshjes përfundimtare mes Kosovës dhe Serbisë, që rezulton me njohje reciproke dhe anëtarësim të Kosovës në Organizatën e Kombeve të Bashkuara.
Republika e Kosovës mirëpret rekomandimet nga ky samit dhe do të marrë obligimet e veta në bazë të vullnetit të qytetarëve të saj, fqinjësisë së mirë dhe orientimit të vet euroatlantik”, ka shkruar ai.

Kujtojmë se presidenti Hashim Thaçi mbrëmë pasi përfundoi darka e liderëve bëri të ditur se më 1 korrik do mbahet një takim i radhës në Paris.

Ndërsa takimin e Berlinit e ka quajtur tejet të rëndë, ku shtoi se “emëruesi i përbashkët i takimit ka qenë që jemi pajtuar të mos pajtohemi”. /Reporteri.net/.

Thaçi: Takimi i radhës më 1 korrik në Paris