Deputetët e LDK-së, PDK-së, VV-së dhe PSD-së kanë mbledhur nënshkrimet për mbajtjen e një seance të jashtëzakonshme ku do të diskutohet për pezullimin e aktiviteteve të kazinove dhe lojërave të fatit në Kosovë dhe do të kërkohet që Kuvendi të miratojë rezolutë lidhur me pezullimin e aktivitetit të kazinove dhe lojërave të fatit, si dhe plotësim-ndryshimin e ligjit ekzistues.

Në mbledhjen e nënshkrimeve për seancën në fjalë mungojnë nënshkrimet e deputetëve të AAK-së dhe Nismës, shkruan Reporteri.net.

Avdullah Hoti, shef i Grupit Parlamentar të LDK-së, në kërkesën e publikuar në Facebook kishte ftuar” të gjithë deputetët, pa përjashtim të nënshkruanin kërkesën për seancë”.

Kjo vjen pasi brenda pak ditësh janë shënuar dy vrasje brenda kazinove.

Ndërkohë Kryesia e Kuvendit ka njoftuar se seanca e jashtëzakonshme për çështjen e kazinove do të mbahet nesër. Paraprakisht nga ora 11:00, do të mblidhet kryesia për ta thirrur seancën në fjalë.

“Të premten, më 22. 03. 2019, do të mblidhet Kryesia e Kuvendit të Republikës së Kosovës, për të shqyrtuar kërkesën e 49 deputetëve për seancë të jashtëzakonshme. Koha: 10:30. Vendi: Salla C-301. Deputetët nënshkrues kanë kërkuar që Kuvendi të miratojë rezolutë lidhur me pezullimin e aktivitetit të kazinove dhe lojërave të fatit, si dhe plotësim-ndryshimin e ligjit ekzistues”, thuhet në njoftimin e Kuvendit.

Tutje, aty tregohet se pas mbledhjes së Kryesisë, Kuvendi pritet të mblidhet menjëherë në seancë të jashtëzakonshme, për të diskutuar lidhur me kërkesën e deputetëve nënshkrues. ​/Reporteri.net/.