Veturat e tipit “Chevrolet” që dikur bartnin presidentin e Kosovës, Ibrahim Rugova, i ka mbuluar pluhuri.

Që prej vitesh pesë veturat e blinduara janë jashtë përdorimit, ato ndodhen të parkuara në oborrin e Kuvendit të Kosovës.

Nga Kuvendi i Kosovës kanë thënë për Reporteri.net se nuk kanë përgjegjësi për veturat e Presidencës.

“Veturat qëndrojnë në hapësirat e parkingut, të paraparë për veturat e zyrtare te Presidencës”, thuhet në përgjigjen e Kuvendit për Reporteri.net.

Ndërkaq të pyetur se a ka ndonjë plan Kuvendi së bashku me Presidencën për t’i sistemuar ato në ndonjë vend ku do të ruheshin, nga institucioni ligjvënës na ka sugjeruar t’i pyesim Presidencën.

Por kjo e fundit nuk ka kthyer përgjigje në pyetjet e dërguara nga Reporteri.net.

Presidenca e Kosovës nuk ka dhënë asnjë përgjigje se çfarë do të ndodhë me këto vetura, edhe pse janë në përgjegjësi të saj.

Kujtojmë se sot LDK festoi 30 vjetorin e themelimit, parti të cilën e krijoi Ibrahim Rugova. /Reporteri.net/.