Presidenti i Serbisë, Aleksandër Vuçiq ka thënë se shteti i tij është i gatshëm të bisedojë me Kosovën “pa afate” dhe “në mirëbesim”, por se sipas tij njohja reciproke nuk është në agjendë.

“Jemi të gatshëm për bisedime por… s’ka flamur të bardhë”, i ka thënë ai në një intervistë Reutersit.

“Besojmë se është në interesin e Kosovës dhe bashkësisë ndërkombëtare që të flitet për qarkullimin e lirë të kapitalit, njerëzve dhe shërbimeve”, ka thënë ai.

Bisedimet mes Kosovës dhe Serbisë u ndërprenë më 2018.

Presidenti serb gjatë kësaj interviste po ashtu ka thënë se shteti i tij do të ketë një qasje të balansuar kur janë në pyetje raportet me BE-në, Rusinë dhe Kinën.