Vuçiq ua qanë hallin Kurtit e Thaçit: Ata janë në gjendje ta akuzojnë njëri-tjetrin për gjërat më të tmerrshme

Presidenti i Serbisë, Aleksander Vuçiq, është deklaruar rreth pretendimeve të kryeministrit të Kosovës në detyrë, Albin Kurti, për arritjen e një mavarrëveshje serkete në mes të Kosovës dhe Serbisë.


Në një intervistë për mediumin serb ‘TV Prva’, Vuçiq ka thënë se nuk ekziston një marrëveshje e tillë për të cilën pretendon Albin Kurti, dhe ka shtuar se me presidentin e Kosovës, Hashim Thaçin, ka kohë që s’ka pasur diskutime serioze.

“Unë s’kam pasur një bisedë serioze me Hashim Thaçin, dhe se mbaj mend herën e fundit kur e kam bërë një gjë të tillë”, është shprehur Vuçiq.

Vuçiq ka thënë se deklarimet e Kurti janë “teori absurde konspirative” dhe e sheh si pjesë të luftës së kreut të Lëvizjes Vetëvendosje me presidentin Thaçi.

“Ata po e luftojnë njëri tjetërin aq ashpër sa që s’ka rëndësi se kush çfarë thotë, ata janë në gjendje ta akuzojnë njëri-tjetrin për gjerat më të tmerrshme, por unë s’jam i interesuar për një gjë të tillë. Unë nuk futem në gjëra të tilla”, ka deklaruar Vuçiq.

Tutje presidneti serb ka thënë se aktualisht nuk ka kurrfarë bisedime me Kosovën, dhe ka thënë se shpreson që në Prishtinë të jetë dikush me të cilin do të mund të bisedohet.

“Ne s’jemi duke biseduar me ta. Shpresoj që atje në Prishtinë të jetë dikush me të cilin ne do të mund të flasim”, ka shtuar Vuçiq.