Xhavit Haliti e “pensionon” Adem Grabovcin, zgjedhet kryetar i PDK-së në Pejë

Njihet si shefi i shefave, por nga sot nuk është as shef i PDK-së në Pejë. Fjala është për ish-deputetin Adem Grabovci. Kjo pasi Xhavit Haliti, nënkryetar aktual i Kuvendit të Kosovës, njëherit themelues i PDK, është zgjedhur kryetar i Degës së kësaj partie në Pejë.


Lajmin për zgjedhjen e  Halitit në krye të PDK’së në Pejë e ka bërë të ditur Arton Muhaxheri i përfshirë në rrahjet që ndodhën ditë më parë në Pejë me Grupin e Adem Grabovcit.

“E pritshme…
Urime Kryetar! Xhavit Haliti”, ka shkruar ai në Facebook, shkruan Reporteri.net.

Kur e pati shpallur kandidaturën, Xhavit Haliti, kishte thënë se Peja do të jetë Kryefjala e Dekadës së re.

“Zotohem se me gërshetimim e gjeneratave, përkatësisht përvojës së veprimtarëve të hershëm dhe ideve inovative të veprimtarëve të rinj, PDK-ja në Pejë do të jetë kryefjala e Dekadës së re në Kosovë”, kishte shkruar Haliti në Facebook.

Kujtojmë se 20 vjet pas lufte PDK asnjëherë nuk ka arritur të dalë parti fituese në Pejë. Kjo e ka detyruar këtë subjekt që të lidh koalicione herë me LDK-në e herë me AAK-në, parti këto që qeverisin herë njëra e herë tjetra nga paslufta.

Mbetet të shihet në zgjedhjet e ardhshme lokale nëse PDK do ta kandidoi Halitin për kryetar komune, por kjo duket pak e besueshme nëse shihet karriera e tij politike, ku nga paslufta nënstop ka mbajtur postin e nënkryetarit të PDK-së. /Reporteri.net/.