Avni Bytyçi, që ka punuar për dy mandate si Këshilltar i Kadri Veselit në Kuvendin e Kosovës, është emëruar sot Zëdhënës i Partisë Demokratike të Kosovës. Ai dikur ka qenë pjesë e shoqërisë civile. Ka studiuar në Shtetet e Bashkuara të Amerikës.

Bytyçi duket se ka marrë një nga pozitat më me fat në Partinë Demokratike të Kosovës.

E kaluara ka treguar se zëdhënësit e kësaj partie, që ka qeverisur me Kosovën dy mandate dhe dy tjera ka qenë pjesë e qeverisë, janë bërë ministra ose kanë zënë pozita tjera të mira, shkruan Reporteri.net.

Vlora Çitaku kishte qenë gjatë zëdhënëse e PDK-së për ta kaluar në Zëvendësministre të Jashtme e më pas Ministre e Integrimeve.

Ndonëse jo i partisë, një figurë tjetër e rëndësishme e PDK-së, Memli Krasniqi ka luajtur rolin e zëdhënësit fillimisht e më pas ministër. Në Qeverinë e Hashim Thaçit, nga viti 2008 deri në vitin 2010, Krasniqi kishte qenë Zëdhënës i Qeverisë. Pas kësaj ishte bërë Ministër i Kulturës, Rinisë dhe Sportit e një mandat tjetër, Ministër i Bujqësisë, Pylltarisë dhe Zhvillimit Rural.

Si zëdhënës i PDK-së një kohë ka shërbyer edhe Blerand Stavileci, që në karrierën e tij të deritanishme ka qenë Ministër i Bujqësisë, Pylltarisë dhe Zhvillimit Rural si dhe Ministër i Zhvillimit Ekonomik. Së fundi ai ishte Shef i Kabinetit të Kryetarit të Kuvendit. /Reporteri.net/