Lidhja Demokratike e Kosovës (LDK) dhe Lëvizja Vetëvendosje (LVV) bashkëqeverisin në Komunë, e Vushtrrisë.

Këto dy parti po përpiqen që të krijojnë koalicion edhe për qeverisje në nivel qendror, pas rezultatit që kanë marrë nga zgjedhjet e parakohshme të 6 tetorit, por që nuk po gjejnë gjuhë të përbashkët.

Anëtari i Këshillit të Përgjithshëm të Lidhjes Demokratike të Kosovës (LDK), Xhafer Tahiri, tha për Ekonomia Online se personalisht është idhtar i këtij koalicioni, por që sipas tij, koalicioni me VV-në nënkupton respekt reciprok dhe besim të ndërsjellë.

Krejt kjo me qëllim që, sipas Tahirit, të ofrohet një ndryshim i shumë kërkuar nga qytetarët.

“Unë udhëheq një koalicion me VV-në në Vushtrri dhe kam qenë ithtar i një koalicioni të tillë. Por koalicion nënkupton një respekt reciprok dhe besim të ndërsjellë për të sjellë ndryshim sepse nuk bëhet koalicioni për një subjekt ose tjetrin, por për të ofruar një ndryshim për qytetarët”, ka thënë Tahiri.

“Unë besoj se LDK-ja po insiston që koalicioni të jetë një ndryshim cilësor për qytetarët e Kosovës”, ka shtuar më pas.

Tahiri ndonëse nuk jep prognoza se çka do të ndodhë me bisedimet ndërmjet VV-së dhe LDK-së për arritjen e marrëveshjes për të qeverisur me vendin, shpreson që këto dy parti të udhëheqin bashkë me vendin.

“Është çështje e dy subjekteve politike se a do të arrihet koalicioni. Por shpresoj që do të ketë”, ka thënë ai.

Kreu i VV-së, Albin Kurti dhe ai i LDK-së, Isa Mustafa të shtunën kanë zhvilluar takimin e fundit për më shumë se tri orë pas të cilit u tha se nuk u arrit marrëveshje. Pozita e presidentit ka bërë që këto dy parti të mos merren vesh.